कलैया,०७ चैत । बारामा सशस्त्र प्रहरीले पचरौताबाट बुधबार राति ट्रकमा लोड गरिएको १ सय ३ किलो गाँजा बरामद गरेको छ ।
ना ८ ख ९०२७ नम्बरको १२ चक्के ट्रकमा लोड गरि रामनगर देखि कोतवाली तर्फ जादै गरेको अवस्थामा पचरौता नगरपालिका वडा नम्बर ३ राम नगर टोलबाट उक्त गाँजा बरामद गरिएको सशस्त्र प्रहरी बल नेपाल बीओपी बेनौलीका सप्रनानि बिश्वराज कुँवरले जानकारी दिएका छन् ।
उनका अनुसार १० वटा पोकामा चालक बस्ने सीटको तल र माथिको हुडमा लुकाई राखेको अवस्थामा गाँजा बरामद भएको छ । पचरौताको रामनगरबाट लागूऔषध ट्रकमा गइरहेको सूचना आएपछि बीओपी बेनौलीका सप्रनानि कुँवर नेतृत्वको टोली अनुगमनमा खटिएको थियो ।
अनुगमन टोलीलाई देखेर चालक ट्रकलाई स्टार्ट अवस्थामै राखेर फरार भएको सप्रनानि कुँवरले बताए । ट्रकका चालक एवं गाँजा ओसारपसार गर्ने व्यक्तिहरुको खोजी भइरहेको प्रहरीले जनाएको छ ।
