बारा, ९ वैशाख । डिभिजन वन कार्यालय, बाराले महेन्द्र राजमार्ग अन्तर्गत पथलैया–अमलेखगञ्ज–चुरियामाई मन्दिरसम्मको क्षेत्रमा पर्ने वन अतिक्रमण हटाउन ३ दिने सूचना जारी गरेको छ।
वन कार्यालयले वन ऐन २०७६ को दफा ४९(ग) विपरीत वन क्षेत्रभित्र अनाधिकृत रूपमा घरटहरा निर्माण गरी बसोबास तथा व्यवसाय सञ्चालन भइरहेको उल्लेख गर्दै त्यस्ता संरचना ३ दिनभित्र हटाउन निर्देशन दिएको हो।
सूचनाअनुसार तोकिएको समयभित्र अतिक्रमण खाली नगरेमा प्रचलित कानुन बमोजिम जबर्जस्ती हटाइने, सो क्रममा लागेको खर्च र वन ऎन २०७६ ले तोके अनुसारको सजाय दुबै हुन सक्ने जनाइएको छ।
उक्त अतिक्रमित क्षेत्रको चारकिल्ला पूर्वमा वन क्षेत्र र दुधौरा नदी, पश्चिममा पर्सा राष्ट्रिय निकुञ्ज, उत्तरमा चुरियामाई मन्दिर र दक्षिणमा पथलैया चोक रहेको जनाइएको छ।
डिभिजन वन कार्यालय बाराका निमित्त डिभिजनल वन अधिकृतद्वारा जारी सूचनामा सबै सम्बन्धितलाई समयमै अतिक्रमण हटाउन अनुरोध गरिएको छ।
