कलैया,०६ असार । बाराको फेटा गाउँपालिकाले आगामी आर्थिक वर्ष २०८२/०८३ का लागि ४० करोड ९ लाख २२ हजार ३४४ रुपैयाँको बजेट सार्वजनिक गरेको छ। शुक्रवार सम्पन्न गाउँपालिकाको १६ औं गाउँसभाबाट गाउँपालिकाका अध्यक्ष रुस्तम अन्सारीले नीति, कार्यक्रम तथा बजेट प्रस्तुत गरेका हुन्।
बजेटमा शिक्षा, कृषि, स्वास्थ्य र पूर्वाधार क्षेत्रलाई विशेष प्राथमिकता दिइएको छ। सार्वजनिक बजेट अनुसार संघीय सरकारबाट वित्तीय समानीकरण अनुदान ९ करोड ७१ लाख, सशर्त अनुदान १४ करोड ४५ लाख, समपूरक अनुदान ८४ लाख, राजस्व बाँडफाँट ८ करोड ३८ लाख ३९ हजार ८६४ र विशेष चालु अनुदान ७२ लाख रुपैयाँ प्राप्त हुने उल्लेख छ।
प्रदेश सरकारबाट समानीकरण अनुदान ६७ लाख ५८ हजार, सशर्त अनुदान ८० लाख, विशेष अनुदान ३० लाख, समपूरक अनुदान २० लाख र सवारी साधन राजस्व बाँडफाँट ५१ लाख २४ हजार ४८० रुपैयाँ प्राप्त हुने जनाइएको छ। यस्तै, गाउँपालिकाको आन्तरिक आम्दानी स्रोतबाट १ करोड रुपैयाँ जुटाइने उल्लेख गरिएको छ।
गाउँपालिका का अध्यक्ष रुस्तम अन्सारीको अध्यक्षतामा सम्पन्न सो कार्यक्रममा उपाध्यक्ष निलम साह,वडा अध्यक्ष,गाउँ कार्यपालिका सदस्य,कर्मचारी,सञ्चारकर्मीहरु लगायतको उपस्तिथि रहेको थियो ।
