बारा, २२ वैशाख। बारा पर्सा सहित देशका १३ वटाभन्दा बढी जिल्लाहरुमा आज तीव्र हावाहुरी, मेघगर्जन र चट्याङ सहित वर्षा हुने मौसम पूर्वानुमान छ । दिउँसो बारा, बाँके, दाङ, रुपन्देही, कपिलवस्तु र आसपासका क्षेत्रमा तीव्र हावाहुरीको सम्भावना रहेको जल तथा मौसम विज्ञान विभागले जनाएको छ ।
यस्तै आज राति कपिलवस्तु, रुपन्देही, बारा, पर्सा, रौतहट र आसपासका क्षेत्रमा तीव्र हावाहुरीको सम्भावना रहेको विभागले जनाएको छ ।
“हावाहुरीबाट जोगिने उपायहरू अपनाउन अनुरोध छ,” विभागले मंगलबार बिहान सार्वजनिक गरेको सूचनामा उल्लेख छ ।
बाराको सिमरा क्षेत्रमा दिउँसो र राति वर्षा हुने सम्भावना ४० प्रतिशत छ भने ताप्लेजुङ, ओखलढुंगा, जिरी र जोमसोममा पानी पर्ने सम्भावना ६० प्रतिशत रहेको विभागले जनाएको छ ।
“हाल नेपालमा पश्चिमी र स्थानीय वायु तथा नेपालको पूर्वी भूभागनजिक तल्लो वायुमण्डलमा रहेको न्यूनचापीय क्षेत्रको प्रभाव रहेको छ,” विभागले भनेको छ ।
