बारा, १७ जेठ। संघीय संसद् अन्तर्गत आज आइतबार (जेठ १७ गते) दुवै सदनको बैठक बस्दै छ।
संसद् सचिवालयका अनुसार प्रतिनिधिसभाको बैठक दिउँसो १ बजे र राष्ट्रियसभाको बैठक बिहान सवा ११ बजे बस्ने गरी आह्वान गरिएको छ।
आजको प्रतिनिधिसभा बैठकमा संसद्को नियमावली मस्यौदा प्रतिवेदनमाथि दफावार छलफल गर्ने र त्यसलाई पारित गर्ने मुख्य कार्यसूची तय गरिएको छ। यसैगरी, बैठकमा अर्थमन्त्री डा. स्वर्णिम वाग्लेले ‘नेपाल राष्ट्र बैंक (तेस्रो संशोधन) विधेयक’ प्रस्तुत गर्न अनुमति माग्ने र सो विधेयक सदनसमक्ष प्रस्तुत गर्ने कार्यसूची रहेको छ।
सोही बैठकमा युवा, श्रम तथा रोजगारमन्त्री रामजी यादवले अन्तर्राष्ट्रिय श्रम संगठनको श्रम निरीक्षणसम्बन्धी महासन्धी, १९४७ र बाध्यकारी श्रम महासन्धी, १९३० सम्बन्धी सन् २०१४ को प्रोटोकल नं. २९ लाई प्रतिनिधिसभामा पेस गर्ने कार्यक्रम समेत तय भएको छ।
