वीरगन्ज, २२ पुस । मधेस प्रदेशका खेलकुद तथा समाजकल्याण मन्त्री प्रमोद जयसवालले विभिन्न मिडियाबाट लगाइएको आरोपहरूलाई निराधार, तथ्यहीन र अपुरो रहेको बताएका छन्। उनले नेपाल पत्रकार महासंघ पर्साको सभाहलमा पत्रकार सम्मेलन आयोजना गरी आफूविरुद्ध सञ्चारमाध्यममा लगाइएका विभिन्न आरोपहरूको खण्डन गरेका हुन्।
मन्त्री जयसवालले अदालतबाट आफूले पूर्ण सफाइ पाएको र ज्यान मार्ने उद्योगसम्बन्धी मुद्दामा पुर्नाबेदन अदालतको आदेशमा राखिएको धरौटी समेत फिर्ता गर्न आदेशको प्रतिलिपी सार्वजनिक गरे । मन्त्री प्रमोद जयसवाले आफ्ना भाइ प्रदीप जयसवालले पनि वन्यजन्तु चोरी सिकारीको आरोपमा सीआइबीसहित सबै निकायबाट पनि सफाइ पाएको दाबी गरे ।
पत्रकार सम्मेलनमा उनले सञ्चारमाध्यमले एकपक्षीय र पूर्वाग्रहपूर्ण ढङ्गले समाचार प्रकाशित गरेको गुनासो पोखे । उनले आफूलाई बदनाम गर्ने नियतले समाचार लेखिएको आरोप लगाउँदै समाचार प्रकाशित गर्नुअघि आफ्नो धारणा समेत माग नगरेकोप्रति गम्भीर असन्तोष व्यक्त गरे । उनले सञ्चारमाध्यमहरूलाई समाचार खण्डन गर्न आग्रह गर्दै त्यसो नगरे कानुनी कदम चाल्ने चेतावनी पनि दिए । साथै, उनले तथ्यविहीन र भ्रमपूर्ण समाचारले जनतामा गलत सन्देश जाने बताउँदै त्यस्ता खबरहरूको जिम्मेवारी सञ्चारमाध्यमले लिनुपर्नेमा जोड दिए ।
मन्त्री जयसवालले समाचार लेख्ने पत्रकार अन्य कुनै व्यक्तिको प्रभावमा आएको दाबी गर्दै सो व्यक्तिले पत्रकारलाई अधुरो जानकारी मात्र दिएको आरोप पनि लगाए । उनले यस्ता समाचार प्रकाशित गर्नुअघि पूरा सत्य जानकारी लिन पत्रकारहरूसँग आग्रह पनि गरे ।
जयसवाले आफूविरुद्ध समाचार लेख्ने पत्रकार जियालाल साहले धम्की प्राप्त गरेको र उनिमाथि सामाजिक सञ्जालमा गरिएको धम्कीपूर्ण टिप्पणीको घटनामा आफू र आफ्नो पार्टीका कार्यकर्ताहरूको संलग्नता अस्वीकार गर्दै यस्ता गतिविधिहरूको अनुसन्धान गरी दोषीमाथि कारबाही गर्नुपर्ने माग गरे । उनले समाचार लेखेकै भरमा पत्रकारलाई धाक धम्की दिनु दुखद भएको बताउँदै त्यस्तो नगर्न आग्रह पनि गरे ।
मन्त्री जयसवालले सबै घटनालाई राजनीतिक षड्यन्त्रको हिस्सा भएको बताउँदै अदालतको आदेशलाई प्रमाण मान्न आग्रह गर्दै आफ्नो व्यक्तिगत छवि र पदीय मर्यादामा आँच पुर्याउने कुनै पनि भ्रम सिर्जनाप्रति असन्तोष व्यक्त गरे ।
