बारा, १४ जेठ। इस्लाम धर्मावलम्बीहरूको महान् पर्व बकर इद र गणतन्त्र दिवसको अवसर पारेर सरकारले देशभर लगातार चार दिन सार्वजनिक बिदा दिने निर्णय गरेको छ।
गृह मन्त्रालयको हालैको निर्णय र पूर्व निर्धारित वार्षिक सार्वजनिक बिदाको सूचीअनुसार आज बिहीबारदेखि आगामी आइतबारसम्म देशभरका सम्पूर्ण सरकारी कार्यालय तथा सार्वजनिक निकायहरू पूर्ण रूपमा बन्द रहने भएका हुन्।
सरकारले इस्लाम धर्मावलम्बीहरूको पवित्र पर्व बकर इद (इद-उल-अज्हा) को अवसरमा आज जेठ १४ गते बिहीबार देशभर सार्वजनिक बिदा दिएको हो। गृह मन्त्रालयले यसअघि नै एक विज्ञप्ति जारी गर्दै बकर इदका दिन सार्वजनिक बिदा दिने निर्णय सार्वजनिक गरेको थियो।
यसैगरी, भोलि जेठ १५ गते शुक्रबार मुलुकभर भव्यताका साथ गणतन्त्र दिवस मनाइँदै छ। गणतन्त्र दिवसका लागिसमेत सरकारले यसअघि नै नेपाल राजपत्रमा सूचना प्रकाशित गरी सार्वजनिक बिदा दिने निर्णय गरिसकेको हुनाले लगातार दोस्रो दिन पनि बिदा कायम रहनेछ।
त्यसलगत्तै जेठ १६ गते शनिबार र जेठ १७ गते आइतबार नियमित साप्ताहिक सार्वजनिक बिदा परेका कारण बिदाको अवधि थप लम्बिएको हो। पर्व, राष्ट्रिय दिवस र साप्ताहिक बिदाहरू लगातार एकैसाथ पर्न गएकाले आजदेखि चार दिनसम्म सरकारी कामकाज ठप्प रहनेछ भने सोमबारदेखि मात्र सम्पूर्ण सरकारी तथा सार्वजनिक कार्यालयहरू नियमित रूपमा सञ्चालनमा आउनेछन्।
