कलैया, १३ साउन। धनुषामा एक बालिकाको हत्या भएको छ। जिल्लाको जनकपुरधाम उपमहानगरपालिका–४ मा धारिलो हतियार प्रहारबाट धनुषाको बटेश्वर गाउँपालिका–५ शान्तिपुरका दिनेश यादवकी १४ वर्षीया छोरी अञ्चली यादवको मृत्यु भएको प्रहरीले जनाएको छ ।
त्यस्तै उक्त घटनामा दुई जना घाइते भएका छन । घाइते हुनेमा अञ्चलीकी आमा ३६ वर्षीया आशा यादव र आशाकी १५ वर्षीया भतिजी राधा यादव रहेको प्रहरीले जनाएको छ । उनीहरुलाई उपचारका लागि प्रादेशिक अस्पताल जनकपुर लगिएको छ । अञ्चली जनकपुरमा डेरा गरी आमासँग पढिरहेकी थिइन् ।
प्रहरीका अनुसार सूर्यनन्द चौधरीको एकतले पक्की घरमा डेरा गरेर बस्ने धनुषाको क्षीरेश्वरनाथ नगरपालिका–९ इच्छापुरका ३५ वर्षीय रामबाबु साहले सोमबार राति तीनै जनामाथि खुकुरी प्रहार गरेका थिए । घटनाको अनुसन्धान भइरहेको र हत्या अभियुक्तको खोजी भइरहेको मधेश प्रदेश प्रहरी प्रमुख उमा चतुर्वेदीले जानकारी दिए।
