बारा,१७ साउन । बाराको सिमरा रंगशालामा आगामी भदौ २१ देखि २८ गतेसम्म अन्तर्राष्ट्रिय महिला फुटबल प्रतियोगिता आयोजना हुने भएको छ ।
सिमरा भेट्रान क्लबको पहलमा पहिलोपटक महिलामैत्री फुटबल आयोजना हुन लागेको हो । प्रतियोगिताबारे शनिबार आयोजित पत्रकार सम्मेलनमार्फत विस्तृत जानकारी दिइएको हो ।
प्रतियोगितामा नेपाल प्रहरी क्लब, एपीएफ क्लब, त्रिभुवन आर्मी क्लब, मोरङ र रौतहट जिल्ला फुटबल संघ, धरान सिटी क्लब, भारतको दार्जिलिङस्थित कुरुसङ गल्स फुटबल एकेडेमी र आयोजक सिमरा भेट्रान क्लब गरी जम्मा आठ टिमको सहभागिता रहनेछ ।
प्रतियोगिता रातिको समयमा सिमरा रंगशालामा हुनेछ । प्रतियोगिताका विजेतालाई नगद पाँच लाख रुपैयाँ र उपविजेतालाई दुई लाख ५० हजार रुपैयाँ प्रदान गरिनेछ ।
त्यस्तै उत्कृष्ट खेलाडीलाई एक लाख रुपैयाँसहित, विभिन्न विभागीय पुरस्कार – उत्कृष्ट डिफेन्डर, मिडफिल्डर, गोलरक्षक, फरवार्ड तथा प्रशिक्षकलाई जनही १० हजार रुपैयाँ प्रदान गरिने आयोजकले जानकारी दिएको छ ।
