बारा, ०७ असार । काठमाडौँ उपत्यका ट्राफिक प्रहरी कार्यालयले उपत्यकाबाट बाहिरिने यात्रुलाई अनावश्यक दुःख, हैरानी र अमर्यादित व्यवहार गरेको आरोपमा कोटेश्वर र जडीबुटी क्षेत्रबाट १० जनालाई पक्राउ गरेको छ।
पक्राउ पर्नेहरूमा धनुषाका ४० वर्षीय सूर्यबहादुर देवकोटा, दोलखाका ३२ वर्षीय प्रकाश शिवाकोटी, भक्तपुरका ५५ वर्षीय हरिभजन थापा, दोलखाका ३८ वर्षीय डिल्लीप्रसाद लामिछाने, र सिन्धुपाल्चोकका २८ वर्षीय सुरेश तामाङ रहेका छन्।
यसैगरी सिन्धुलीका २७ वर्षीय तिलककुमार थापा, दोलखाका २६ वर्षीय खड्कबहादुर तामाङ, सिन्धुलीका ३६ वर्षीय डोरकुमार श्रेष्ठ, ओखलढुङ्गाका ४५ वर्षीय नन्दलाल बुढाथोकी, र सिन्धुपाल्चोकका ३६ वर्षीय राजेश सापकोटालाई पनि प्रहरीले नियन्त्रणमा लिएको छ।
कार्यालयका प्रवक्ता नरेशराज सुवेदीका अनुसार सो क्षेत्रमा सञ्चालित बस काउन्टरका कर्मचारी, चालक तथा सहचालक रहेका व्यक्तिहरूले यात्रु तानातान गर्ने र झोला खोस्ने जस्ता अभद्र कार्य गरिरहेको अवस्थामा फेला परेको हो। पक्राउ परेका सबै जनालाई आवश्यक अनुसन्धान तथा थप कानुनी कारबाहीका लागि जिल्ला प्रहरी परिसर काठमाडौँ पठाइएको ट्राफिक प्रहरीले जनाएको छ।
