पर्सा, ०६ साउन। जिल्ला प्रहरी कार्यालय पर्साले लागूऔषधसहित एक जनालाई नियन्त्रणमा लिएको जनाएको छ। विशेष सूचनाको आधारमा प्रहरीले वीरगञ्ज महानगरपालिका–११ श्रीपुर क्षेत्रमा शंका लागेका एक व्यक्तिलाई जाँच गर्दा लागूऔषध बरामद भएको हो।
प्रहरीका अनुसार पैदल हिँडिरहेका ७२ वर्षिय नारायण बहादुर के.सी. लाई रोकि जाँच गर्दा उनको साथबाट कागज बाहेक करिब २१.९१ ग्रामभन्दा बढी खैरो हिरोइनजस्तो देखिने पदार्थ फेला परेको थियो। साथै, विभिन्न साना कागजका पुडिया, प्लास्टिकका प्याकेट र डिजिटल तराजु समेत बरामद गरिएको प्रहरीले जनाएको छ।
बरामद गरिएको लागूऔषधमध्ये १५ वटा पुडियामा कागजमा राखिएको पदार्थ र अन्य पुडियामा करिब ४०.७४ ग्राम पदार्थ रहेको उल्लेख गरिएको छ। थप रूपमा, लागूऔषध कारोबारसँग सम्बन्धित कागजातसमेत फेला परेको बताइएको छ।
पक्राउ परेका व्यक्तिलाई आवश्यक अनुसन्धानका लागि हिरासतमा राखिएको छ भने घटनाबारे थप अनुसन्धान भइरहेको जिल्ला प्रहरी कार्यालय पर्साले जानकारी दिएको छ।
