कलैया, २७ साउन। वीरगञ्जस्थित नारायणी अस्पतालमा उपचारका क्रममा मंगलबार कैदीको मृत्यु भएपछि मृतकका आफन्तले अस्पताल अगाडि प्रदर्शन गरेका छन। वीरगञ्ज महानगरपालिका–२५ निवासी राहुल साह तुराहाको उपचारका क्रममा मृत्यु भएको हो । मृतक तुराहा कर्तव्य ज्यान मुद्दामा २०७९ साल देखि अदालतको आदेश अनुसार वीरगञ्ज कारागारमा जन्मकैद सजाय काटिरहेका थिए ।
कारागारमा व्यायाम गर्ने क्रममा राहुलको स्वास्थ्यमा समस्या देखिएपछि उनलाई उपचारको लागि तत्काल नारायणी अस्पताल ल्याइएको थियो । अस्पतालले प्रारम्भिक उपचारपछि थप उपचारका लागि नेशनल मेडिकल कलेज तथा शिक्षण अस्पताल रेफर गरेको कारागार प्रशासनले जनाएको छ। यता मृतकका आफन्तजनले रेफर प्रक्रियामा ढिलाइ भएको र कारागार प्रशासनले समयमै अन्य अस्पताल लैजान अनुमति नदिएको कारण मृत्यु भएको आरोप लगाएका छन ।
उनीहरुले अस्पताल अगाडि टायर बालेर प्रदर्शन गरेका छन्। केही समय तनावको स्थिति सिर्जना भएको र हाल अवस्था सामान्य रहेको जिल्ला प्रहरी कार्यालय पर्साले जनाएको छ। जिल्ला प्रशासन कार्यालय पर्सामा मृतकका आफन्त र प्रशासनबिच छलफल भइरहेको जनाइएको छ।
मृतकको शव पोस्टमार्टमका लागि नारायणी अस्पतालमै राखिएको छ ।
