कलैया, ०५ वैशाख । बारा प्रहरीले ३ सय किलो भन्दा बढि गाँजा बरामद गरेको छ। जिल्लाको विभिन्न स्थानबाट प्रहरीले गाँजा सहित ५ जनालाई समेत नियन्त्रणमा लिएको छ। जीतपुरसिमरा उपमहानगरपालिका वडा नं.३ बजनीबाट बिहिवार राति ११ बजे प्रहरीले ३ सय ५ किलो लागूऔषध गाँजा बरामद गरेको छ। हेटौडाबाट वीरगंज तर्फ आउदै गरेको ना ५ ख २५०४ नम्बरको मिनी ट्रकलाई चेकजाँच गर्दा लुकाई छिपाई लगी रहेको अवस्थामा उक्त मात्रामा लागूऔषध गाँजा बरामद भएको जिल्ला प्रहरी कार्यालय बाराले जनाएको छ।
प्रहरीले ट्रक चालक मकवानपुरको कैलास गाउँपालिका-४ बस्ने वर्ष ३२ को राजन लामा त्यस्तै ट्रकमा सवार हेटौडा उपमहानगरपालिका-३ बस्ने वर्ष ३३ को ईश्वर लोप्चन र गाँजा ओसार पसारमा संलग्न मकवानपुरको कैलास गाउँपालिका-१० बस्ने वर्ष २७ को जिवन ठोकरलाई पक्राउ गरेको हो । त्यस्तै प्रहरीले प्रसौनी गाउँपालिका-४ खुटवाबाट २ किलो १ सय ४० ग्राम लागूऔषध गाँजा वरामद गरेको छ। ईलाक प्रहरी कार्यालय प्रसौनीबाट खटिएको प्रहरी टोलीले खुटवा बस्ने वर्ष ३१ को पवन कुमार साहले आफ्नै घरमा विक्री वितरण गर्ने र लुकाई छिपाई राखेको अवस्थामा लागूऔषध गाँजा वरामद गरेको हो । प्रहरीले साहलाई समेत नियन्त्रणमा लिएको छ।
त्यस्तै प्रहरीले पचरौता नगरपालिका-१ मुसहरी टोल स्थित मकै बारी हुँदै टाउकोमा बोकी नेपालबाट भारत तर्फ ओसार पसार गर्दै गरेको अवस्थामा लागूऔषध गाँजा सहित एक जनालाई पक्राउ गरेको छ । पक्राउ पर्नेमा भारतको बिहार प्रान्त मोतिहारी जिल्ला पञ्चायत बिजवनी थाना जितना ग्राम रेगनीया बस्ने बर्ष २५ को राजबिहारी कुमार रहेको प्रहरीले जनाएको छ। उनको साथबाट ४ वटा पोकामा ६० किलो गाँजा बरामद भएको जिल्ला प्रहरी कार्यालयले जनाएको । उनीहरु ५ जनालाई नियन्त्रणमा लिएर आवश्यक अनुसन्धान अगाडी बढाइएको प्रहरीले जनाएको छ।
