कलैया, २५ साउन। बाराको बरियारपुरस्थित विश्व प्रसिद्ध गढीमाई मन्दिर परिसरमा महागढीमाई फाउण्डेशनको आयोजनामा आइतबार वृहत वृक्षारोपण कार्यक्रम सम्पन्न भएको छ। । “स्वच्छ वातावरण, समृद्ध समाज” नारासहित वर्ल्ड लिंक बाराको सहयोग र महागढीमाई नगरपालिकाको सहकार्यमा वृहत वृक्षारोपण कार्यक्रम आयोजना गरिएको हो ।
कार्यक्रमका प्रमुख अतिथि नेपाली काँग्रेस बारा जिल्ला सचिव भैयाराम यादवले हरियाली विकासबिना समृद्धि सम्भव नभएको उल्लेख गर्दै, वृक्षारोपण केवल वातावरण संरक्षणको पहल मात्र नभई जीवनशैली र समाज रूपान्तरणतर्फको महत्वपूर्ण कदम भएको बताए। उनले गढीमाई मन्दिर परिसरको सुन्दरता बढाउने अभियानमा फाउण्डेशनको भूमिकाको प्रशंसा गरे।
खल्ती एपका सह–संस्थापक अरबिन्द साहले वृक्षारोपणबाट धार्मिक तथा सांस्कृतिक पर्यटन प्रवर्द्धनमा टेवा पुग्ने र गढीमाई क्षेत्रको आकर्षण थपिने विश्वास व्यक्त गरे। वृक्षारोपण कार्यक्रममा स्थानीय जनप्रतिनिधि, समाजसेवी, शिक्षक, युवा तथा पत्रकारको उल्लेखनीय सहभागिता थियो। सहभागीहरूलाई गम्छा र सम्मानपत्रद्वारा सम्मान गरिएको थियो।
वृक्षारोपण जस्ता वातावरणमैत्री र समाजसेवामूलक अभियानले गढीमाई मन्दिर क्षेत्रमा हरियाली विस्तार, प्राकृतिक सन्तुलनको संरक्षण र सामुदायिक एकताको सन्देश फैलाउने अपेक्षा गरिएको महागढीमाई फाउण्डेशनले जनाएको छ । फाउण्डेशनले आगामी दिनमा पनि यस्ता कार्यक्रम निरन्तर सञ्चालन गर्ने प्रतिबद्धता जनाएको छ।
