कलैया, ८ असोज। केहि दिन अघि भएको जेनजी प्रदर्शनको क्रममा महाराजगन्जमा प्रहरी सहायक निरीक्षक (असई) मिलन रायलाई बीभत्स हत्यामा संलग्न रहेका थप एक जनालाई प्रहरीले पक्राउ गरेको छ। पक्राउ पर्नेमा सिन्धुपाल्चोक घर भएका ओम पौडेल रहेका छन। उनलाई उपत्यका अपराध अनुसन्धान कार्यालयबाट खटिएको विशेष टोलीले धापासीबाट नियन्त्रणमा लिएको हो ।
गत भदौ २४ गते प्रदर्शनका क्रममा उद्दण्ड समूहले प्रहरी वृत्त महाराजगन्जमा आगजनी गर्नुका साथै दुई जना प्रहरीको निर्मम हत्या गरेका थिए । मृत्यु हुनेमा असई राय र प्रहरी जवान उत्तम थापा रहेका छन् । प्रहरी जवान थापालाई त डीएसपी भन्दै कुटपिट गरी हत्या गरिएको थियो । ‘गोली हान्न दिने तै डीएसपी हैनस्’ भन्दै कुटेर हत्या गरिएको थियो ।
प्रहरीले घटनाको भिडियोको आधारमा दुई जनालाई नियन्त्रणमा लिएको हो। प्रहरीको हत्या आरोपमा यस अघि असोज ४ गते काभ्रे घर भएका युवराज क्यापछाकी पक्राउ परेका थिए ।
