कलैया, २१ कात्तिक। पर्सामा पोखरीमा डुबेर बाराको एकजना बालकको मृत्यु भएको छ। जिल्लाको वीरगन्ज महानगरपालिका वडा नं २८ सिधुवाटोलस्थित छठिघाट नजिकको पोखरीमा डुबेर एक १२ वर्षिय बालकको मृत्यु भएको हो ।
डुबेर मृत्यु हुनेमा बाराको विश्रामपुर गाउँपालिका वडा नं ५ मुसहरवा बस्ने कन्हाई साहको १२ वर्षिय छोरा शनी कुमार साह रहेका छन्। शुक्रबार बिहान १० बजेतिर एकजना बालकको डुबेको जानकारी स्थानीयवासीले सशस्त्र प्रहरीलाई दिएका थिए ।
स्थानीयको जानकारी प्राप्त हुनसाथ सशस्त्र प्रहरी बल नेपाल बेस क्याम्प बेलवाबाट सशस्त्र प्रहरी नायव निरीक्षक लोकबहादुर कार्कीको कमाण्डमा ५ जना, सशस्त्र प्रहरी बल नेपाल नं.१३ गण मुख्यालय पर्साबाट सशस्त्र प्रहरी सहायक निरीक्षक संजिव यादवको कमाण्डमा ७ जनाको उद्धार टोली र वडा प्रहरी कार्यालय बिर्ताबाट प्रहरी निरीक्षक नवीन थापाको कमाण्डमा प्रहरीको टोली खटिएको थियो ।
उद्धार टोलीले खोजीकार्यपछि बालकको शव पोखरीबाट बाहिर निकालेर आवश्यक कानूनी प्रकृयाका लागि नेपाल प्रहरीलाई बुझाएको थियो।
