कलैया, ४ मंसिर। जिल्ला प्रशासन कार्यालय बाराले आज (बिहिबार) पनि सिमारामा कर्फ्यू जारी गरेको छ। बुधबार भएको घटनामा संलग्न अन्य सबैलाई पक्राउ गरी कार्वाहीको माग गर्दै बिहिबार बिहान देखि युवाहरु सडकमा उत्रिएका छन।
प्रदर्शन उग्ररुप लिए पछि प्रशासनले मंसिर ४ गते दिउँसो १ बजेदेखि बेलुका ८ बजेसम्म सिमरा विमानस्थल र आसपासका क्षेत्रमा कर्फ्यु आदेश जारी गरेको हो । प्रमुख जिल्ला अधिकारी धर्मेन्द्र कुमार मिश्रद्वारा जारी सुचनामा बिरगंज–पथलैया सडक खण्डको पथलैया चोकदेखि जितपुर ललका पुलसम्म राजमार्गको दायाँ-बायाँ ५०० मिटर वरिपरि र सिमरा विमानस्थल आसपास ५०० मिटर वरिपरि सम्म कर्फ्यू लगाइएको उल्लेख छ।
कर्फ्यु अवधिभर कुनै पनि किसिमका भिडभाड, जमघट, जुलुस, प्रदर्शन, सभा, बैठक तथा धर्ना गर्न पूर्ण रूपमा निषेध गरिएको प्रशासनले जनाएको छ। सिमरामा बुधबार जेनजी समुह र नेकपा एमाले आवद्ध कार्यकर्ताबीच झडप भएसँगै हिजो देखि सिमरा अशान्त बनेको छ।
