बारा, २१ साउन । अविरल वर्षाका कारण देशका विभिन्न भागमा बाढी, पहिरोले देशभरको यातायात सेवा प्रभावित भएको छ। सम्भावित दुर्घटना र क्षति न्यूनीकरण गर्न प्रशासनले जोखिमयुक्त सडकखण्डहरूमा रात्रिकालीन सवारी सञ्चालनमा कडा रोक लगाएको छ।
विशेष गरी काभ्रेपलाञ्चोक र सिन्धुली जोड्ने बीपी राजमार्गको खुर्कोट–नेपालथोक–कटुन्जेबेँसी खण्डमा साँझ ६ बजेदेखि बिहान ४ बजेसम्म तथा कान्ति लोकपथमा बेलुका ५ देखि बिहान ५ बजेसम्म सबै प्रकारका सवारीसाधन चलाउन प्रतिबन्ध लगाइएको छ। अन्य समयमा भने मौसम र सडकको अवस्था हेरेर गाडी आवतजावत गराइने व्यवस्था मिलाइएको छ।
पहाडी तथा हिमाली जिल्लाहरूलाई जोड्ने मुख्य राजमार्गहरू पहिरोका कारण अस्तव्यस्त बनेका छन्। पूर्वमा मेची राजमार्गको राजदुवाली खण्ड र अरनिको राजमार्गका जिरोकिलो, कोदारी तथा लिपिङ क्षेत्रमा सडक भासिँदा यातायात पूर्ण रूपमा ठप्प छ। उत्तरगया नजिकै त्रिशूली नदीले सडक बगाएपछि पासाङल्हामु राजमार्ग तथा मुगुको नाग्म–गमगढी सडक पनि अवरुद्ध बनेका छन्।
त्यसैगरी कालीगण्डकी करिडोरका बागलुङ र पाल्पा खण्डका साथै मध्यपहाडी लोकमार्गको रुकुम पूर्व क्षेत्रमा पहिरो खस्दा आवतजावत ठप्प छ। म्याग्दीका बैसेरी र भीरकाटे तथा बेनी–जोमसोम र मालढुंगा–बेनी सडकखण्डमा पनि पहिरोका कारण सवारीसाधन ठप्प भएका छन्।
कतिपय स्थानमा भने वैकल्पिक मार्ग प्रयोग गरी यातायात सुचारु गराउने प्रयास भइरहेको छ। दोलखाको लामासाँघु–रामेछाप सडकखण्डमा तामाकोसीले बाटो कटान गरेपछि स्थानीय विद्युत् सहकारीको परिसर प्रयोग गरेर साना सवारीसाधन सञ्चालनमा ल्याइएको छ।
लगातारको वर्षाका कारण देशभरका सडकखण्डहरू जुनसुकै बेला अवरुद्ध हुन सक्ने रहेकाले प्रहरी तथा स्थानीय प्रशासनले सर्वसाधारणलाई अत्यावश्यक कामबाहेक लामो दूरीको यात्रा नगर्न र यात्रा गर्नुअघि अनिवार्य रूपमा सडकको अवस्थाबारे पूर्वजानकारी लिन आग्रह गरेका छन्।
