बारा, ०३ भदौ । चालु आर्थिक वर्ष २०८३/८४ को पहिलो महिना साउनमा वैदेशिक रोजगारीका लागि कुल ७० हजार ४ सय ४१ जना नेपालीले श्रम स्वीकृति लिएका छन्।
वैदेशिक रोजगार विभागका अनुसार यस अवधिमा श्रम स्वीकृति लिनेमा ६० हजार ४ सय ७२ जना पुरुष र ९ हजार ९ सय ६९ जना महिला रहेका छन्।
साउन महिनामा नेपाली श्रमिकका लागि युनाइटेड अरब इमिरेट्स (यूएई) र मलेसिया प्रमुख रोजगारी गन्तव्य बनेका छन्। विभागको तथ्याङ्कअनुसार सबैभन्दा बढी यूएई जानका लागि १८ हजार ७८४ जना र मलेसियाका लागि १२ हजार ४९८ जनाले श्रम स्वीकृति लिएका छन्। त्यसैगरी खाडी मुलुक कतारका लागि १० हजार ३६०, साउदी अरेबियाका लागि ८ हजार ६१३ र कुवेतका लागि ४ हजार ५६७ जनाले अनुमति पाएका छन्।
युरोपेली तथा एसियाली अन्य मुलुकतर्फ रोमानियाका लागि २ हजार ९०८, जापानका लागि १ हजार २४४, ओमानका लागि १ हजार १७९, पोर्चुगलका लागि १ हजार १७९ र टर्कीका लागि १ हजार २१ जनाले श्रम स्वीकृति लिएका छन्।
