बारा, ०७ जेठ । मधेस प्रदेशको प्रमुख आर्थिक खम्बा मानिने कृषि क्षेत्रमा आएको मन्दीका कारण चालु आर्थिक वर्षमा यहाँको आर्थिक वृद्धिदर निकै कमजोर रहने प्रक्षेपण गरिएको छ।
राष्ट्रिय तथ्याङ्क कार्यालय, तथ्याङ्क समन्वय कार्यालय धनुषाले बुधबार सार्वजनिक गरेको प्रादेशिक कुल गार्हस्थ्य उत्पादन अनुमानसम्बन्धी समष्टिगत आर्थिक सूचकले यस्तो निराशाजनक चित्र देखाएको हो। मुख्य गरी धान, मत्स्य (माछापालन) तथा वन क्षेत्रको योगदानमा तुलनात्मक रूपमा व्यापक कमी आएकाले प्रदेशको समग्र अर्थतन्त्र सुस्त बन्न पुगेको हो।
तथ्याङ्क अधिकृत नरबहादुर कुँवरका अनुसार यस पटक पर्याप्त मात्रामा पानी नपरेका कारण (खडेरीका कारण) धान र माछा उत्पादनमा गम्भीर नकारात्मक प्रभाव परेको छ। जसका कारण मधेस प्रदेशले विगत तीन वर्षयताकै सबैभन्दा कम आर्थिक वृद्धिदर हासिल गर्ने देखिएको छ।
विगतका वर्षहरूलाई हेर्दा आर्थिक वर्ष २०८०/८१ मा मधेसको आर्थिक वृद्धिदर ३ दशमलव १८ प्रतिशत र आर्थिक वर्ष २०८१/८२ मा २ दशमलव ७२ प्रतिशत रहेको थियो। लगातार दुई वर्षदेखि कृषि उत्पादनमा परेको प्रतिकूल असरले गर्दा मधेसको आर्थिक वृद्धिदर निरन्तर खस्कँदै गएको कार्यालयको प्रतिवेदनले औंल्याएको छ।
यद्यपि, राष्ट्रिय अर्थतन्त्रमा भने मधेस प्रदेशको बलियो हिस्सा कायमै रहने अनुमान छ। आर्थिक वर्ष २०८२/८३ मा राष्ट्रिय वार्षिक कुल गार्हस्थ्य उत्पादनमा मधेस प्रदेशको योगदान १३ दशमलव १ प्रतिशत रहने प्रारम्भिक अनुमान गरिएको छ।
तथ्याङ्क सार्वजनिकिकरण कार्यक्रममा बोल्दै मधेस प्रदेश नीति तथा योजना आयोगका सदस्य राजकिशोर सिंहले अर्थतन्त्रमा कृषिको योगदान घट्दै जानु चिन्ताको विषय भएको र यसैका कारण अहिलेको समस्या निम्तिएको स्वीकार गरे।
उनले यो चुनौतीलाई सम्बोधन गर्न मधेस प्रदेश सरकारले आगामी बजेटमा कृषि, शिक्षा, स्वास्थ्य, पूर्वाधार र सामाजिक विकासका क्षेत्रहरूलाई विशेष प्राथमिकतामा राखेर योजनाहरू अघि बढाउने प्रतिबद्धता समेत व्यक्त गरे।
