बारा, २१ भदौ । रसुवास्थित भोटेकोशी नदीमा भदौ १० गते गएको विनाशकारी बाढीमा परी ज्यान गुमाउनेको संख्या एक हजार ३३९ पुगेको छ भने चार हजार ४४ जना अझै सम्पर्कविहीन रहेका छन्।
नेपाल प्रहरीका केन्द्रीय प्रवक्ता एवं प्रहरी नायब महानिरीक्षक अविनारायण काफ्लेले आज बिहान सार्वजनिक गर्नुभएको पछिल्लो विवरण अनुसार मृतकमध्ये ३२५ महिला, ५२३ पुरुष र पहिचान हुन नसकेका ४९३ शव रहेका छन्।
बेपत्ता रहेका चार हजार ४४ जनामध्ये दुई हजार ८६३ स्वदेशी पुरुष, ५७५ महिला, २६९ विदेशी पुरुष, ३३२ विदेशी महिला र अन्य पाँच जना रहेका छन्। बाढी प्रभावित क्षेत्रमा सुरक्षा निकायले खोजी, उद्धार तथा शव व्यवस्थापनको कार्यलाई तीव्र रूपमा निरन्तरता दिइरहेका छन्।
फेला परेका शवमध्ये एक हजार ३७ वटालाई सुरक्षित रूपमा जमिनमा गाडेर व्यवस्थापन गरिसकिएको छ भने बाँकीको पहिचान र व्यवस्थापन प्रक्रिया अघि बढाइएको छ।
विपद्पछि हालसम्म नौ हजार १५१ जना घाइतेको उद्धार गरिएकोमा तीन हजार ९८ जनालाई होल्डिङ सेन्टरमा राखिएको छ। शवको सनाखत तथा बेपत्ताको पहिचानका लागि डिएनए परीक्षणलाई प्राथमिकता दिँदै अहिलेसम्म एक हजार २८६ मृतक र एक हजार १८६ आफन्त गरी कूल दुई हजार ४७२ जनाको नमूना सङ्कलन गरिएको छ।
