कलैया, १६ फागुन। आगामी फागुन २१ गते हुन गइरहेको प्रतिनिधिसभा सदस्य निर्वाचनलाई लक्षित गर्दै निर्वाचन आयोगले देशभरका मतदान केन्द्रमा प्राथमिक स्वास्थ्य उपचार सेवाको व्यवस्था गर्न निर्देशन दिएको छ।
आयोगले निर्वाचनमा खटिने कर्मचारी, सुरक्षाकर्मी र मतदानका लागि आउने ज्येष्ठ नागरिक, अपाङ्गता भएका व्यक्तिलगायतका मतदाताको स्वास्थ्य सुरक्षालाई मध्यनजर गर्दै आकस्मिक सेवा सुचारु राख्न स्वास्थ्य तथा जनसङ्ख्या मन्त्रालय र सङ्घीय मामिला तथा सामान्य प्रशासन मन्त्रालयलाई पत्राचार गरेको छ।
सोही अनुसार देशभरका अस्पताल तथा स्वास्थ्य संस्थामा स्वास्थ्यकर्मी र औषधी तयारी अवस्थामा राख्न र आवश्यक समन्वयका लागि सबै स्थानीय तहलाई समेत निर्देशन दिइएको छ। निर्वाचनलाई भयरहित वातावरणमा सम्पन्न गर्न सरकारी संयन्त्रसँग निरन्तर सहकार्य भइरहेको आयोगले जनाएको छ।
प्रतिक्रिया लेख्नुहोस्
