बारा, ०८ असोज। सम्भावित भारीदेखि अति भारी वर्षाका कारण बाढी, पहिरो तथा डुबानजस्ता विपद् निम्तिन सक्ने भन्दै स्वास्थ्य तथा खाद्य स्वच्छता मन्त्रालयले स्वास्थ्य क्षेत्रलाई उच्च सतर्कतासहित पूर्वतयारी अवस्थामा रहन निर्देशन दिएको छ।
मौसम पूर्वानुमान महाशाखाको सूचना तथा प्रधानमन्त्री तथा मन्त्रिपरिषद्को कार्यालयको निर्देशनअनुसार मन्त्रालयले असोज ८ गतेदेखि ११ गतेसम्म देशका विभिन्न स्थानमा हुन सक्ने भारीदेखि अति भारी वर्षालाई ध्यानमा राख्दै प्रदेशका स्वास्थ्य/सामाजिक विकास मन्त्रालय, स्वास्थ्य सेवा विभाग, स्वास्थ्य विज्ञान प्रतिष्ठान तथा संघीय अस्पताललाई आवश्यक तयारी गर्न निर्देशन दिएको हो।
मन्त्रालयले शनिबारसहित सार्वजनिक बिदाका दिनमा समेत स्वास्थ्यकर्मीलाई आवश्यकता अनुसार सम्पर्कमा रहने र विपद् सिर्जना भए तत्काल परिचालन हुन सक्ने गरी तयारी अवस्थामा राख्न भनेको छ।
प्रदेशअन्तर्गतका स्वास्थ्य निर्देशनालय, स्वास्थ्य कार्यालय तथा सम्बन्धित निकायलाई स्थानीय तहसँग निरन्तर समन्वय र सञ्चार कायम गरी स्वास्थ्य सेवा तथा विपद् प्रतिकार्यका लागि तयारी अवस्थामा रहन निर्देशन दिइएको छ। साथै, प्रदेश स्वास्थ्य आपतकालीन कार्यसञ्चालन केन्द्र (PHEOC) लाई चौबीसै घण्टा सञ्चालनमा राखी विपद्सम्बन्धी सूचना संकलन, समन्वय र प्रतिकार्य व्यवस्थापन गर्न भनिएको छ।
स्वास्थ्य सेवा विभागलाई आकस्मिक तथा नियमित स्वास्थ्य सेवा निरन्तर सञ्चालनका लागि आवश्यक जनशक्ति, औषधि तथा स्वास्थ्य सामग्रीको व्यवस्थापन गर्न तथा स्वास्थ्य संस्थाको तयारी अवस्था र आकस्मिक प्रतिकार्यसम्बन्धी योजना असोज ८ गतेभित्र मन्त्रालयमा पेश गर्न निर्देशन दिइएको छ।
सम्भावित जोखिमयुक्त जिल्लामा आवश्यक औषधि तथा स्वास्थ्य सामग्री, सर्पदंशविरुद्धको औषधि (Anti-snake Venom), जीवनजललगायत अत्यावश्यक सामग्री पर्याप्त मौज्दातमा राख्न र द्रुत प्रतिकार्य टोली (Rapid Response Team) लाई तयारी अवस्थामा राख्न पनि भनिएको छ।
त्यस्तै, प्रसूतिको सम्भावित मिति नजिक रहेका गर्भवती महिला तथा दीर्घरोगीलाई विपद्का कारण स्वास्थ्य सेवामा पहुँच प्रभावित हुन सक्ने अवस्थालाई ध्यानमा राख्दै आवश्यकताअनुसार स्वास्थ्य संस्थाको नजिक वा सुरक्षित स्थानमा रहन तथा नियमित सेवन गर्नुपर्ने औषधि पर्याप्त मात्रामा साथमा राख्न अनुरोध गर्न मन्त्रालयले निर्देशन दिएको छ।
आकस्मिक स्वास्थ्य समस्या वा विपद्का कारण तत्काल स्वास्थ्य सेवा आवश्यक परेमा एम्बुलेन्स सेवा १०२ मा सम्पर्क गरी उपचारको व्यवस्था मिलाउन सहजीकरण गर्न स्वास्थ्य आपतकालीन कार्यसञ्चालन केन्द्र (HEOC) लाई समेत निर्देशन दिइएको मन्त्रालयले जनाएको छ।
