कलैया, ११ चैत। अरनिको यादवको अलराउण्ड पारीको सहयोगमा प्रधानमन्त्री कप (पिएम कप) मा मधेश प्रदेशले पहिलो जित निकालेको छ। वीरगन्जमा आज भएको खेलमा मधेशले सुदूरपश्चिमलाई ५ विकेटले पराजित गर्दै पहिलो जित निकालेको हो।
जितको लागि सुदुरपश्चिमबाट १ सय ६१ रनको सामान्य लक्ष्य पाएको मधेशले ३८.४ ओभरमा ५ विकेट गुमाउँदै लक्ष्य पुरा गर्यो। मधेशका लागि ओपनर मयन यादव र कप्तान अनिल शाह समान १३ रन जोडेर आउट हुँदा हिंमान्सु दत्त शुन्यमा आउट भए।
पवन सर्राफले २१ रन जोडे भने पाँचौं विकेटको लागि अरनिको यादव र मोहम्मद आदिल अलामले ५३ रनको साझेदारी गरे। आदिलले ३० बलमा २ चौका र २ छक्का सहित ३४ रन जोडे र अरनिकोले अविजित ४६ रन बनाउँदै मधेशलाई जित दिलाए। रूपेश सिंह अविजित १६ रनमा बनाए।
सुदूरपश्चिमका अशोक धामीले ७ ओभरमा १ मेडन सहित २६ रन दिएर ३ र शेर मल्लले भने २ विकेट लिए। टस जितेर मधेशले फिल्डिङ रोजेपछि पहिले ब्याटिङ गरेको सुदूरपश्चिमले ४३.२ ओभरमा संघर्ष गर्दै १ सय ६० रन बनाएको थियो।
खराब सुरूवात गरेको सुदूरपश्चिमको इनिङ्सलाई कुनैपनि खेलाडीले सम्हाल्न सकेनन्। ५९ रन जोड्दा ३ विकेट गुमाउने क्रममा ओपनर राजु रिजाल ९ रनमा, खड्ग बोहरा ७ रनमा र अर्का ओपनर अभिषेक पाल ३३ रनमा आउट भए। अभिषेक नै टोलीका लागि ४५ बल खेलेर ५ चौका सहित सर्वाधिक ३३ रन जोडे।
त्यसपछि निरन्तर अन्तरालमा विकेट झरि नै रह्यो। किरण ठगुन्ना र नारायण जोशीले समान २३ तथा अशोक धामी अविजित १९ रनमा रहे। ४ खेलाडी बाहेक अन्यले दोहोरो अंकमा रन छुन सकेनन्।
बलिङमा अरनिको यादवले ७ ओभर २ बलमा २ मेडन सहित २५ रन दिएर ३ विकेट लिए। प्रदीप पासवानले २ विकेट झारे। उक्त खेलको प्लेयर अफ दि म्याच अरनिको यादव भए।
