बारा, १६ भदौं। बाराको परवानीपुर गाउँपालिका–४ स्थित केडिया आँखा अस्पताल अगाडि ईभी गाडीको ठक्करबाट ७ वर्षीय बालकको मृत्यु भएको छ।
वीरगञ्जबाट हेटौंडातर्फ जाँदै गरेको मधेस प्रदेश ०३–००१ ज ०९०१ नम्बरको ईभी गाडीले मंगलबार दिउँसो करिब १२ः३० बजे बाटो काट्दै गरेका भारत मोतिहारी जिल्लाका महम्मद गुफानका ७ वर्षीय छोरा महम्मद ईशानलाई ठक्कर दिएको थियो।
ठक्करबाट टाउकोमा गम्भीर चोट लागेका ईशानलाई उपचारका लागि वीरगञ्जस्थित बयोधा अस्पताल लगिएको थियो। उपचारकै क्रममा दिउँसो २ बजेतिर चिकित्सकले ईसीजी जाँचपछि उनलाई मृत घोषणा गरेका थिए।
घटनापछि प्रहरीले ईभी गाडी र चालक पर्साको वीरगञ्ज महानगरपालिका–३२ निवासी २६ वर्षीय लक्षुमन पासवानलाई नियन्त्रणमा लिएको छ।
मृतकको शव मुचुल्का पश्चात् पोस्टमार्टमका लागि नारायणी अस्पताल, पर्सा लगिएको प्रहरीले जनाएको छ। घटनाबारे थप अनुसन्धान भइरहेको छ।
